واش زعما الخدمة مجودة ؟‎

لاحظت أن أول سؤال و معيار مهم في اختيار دبلوم عند أغلب الطلبة هو : واش هاد الديبلوم يخدمني في الدولة ؟

زعما واش يمكن بهاد الدبلوم ندوز كونكورات الوظيفة العمومية ؟

نتافقو ... واش الخدمة في الدولة مجودة ؟

فالوظيفة العمومية راه الطلب لي قل من العرض. و شوف غي آلاف المتخرجين قدام البرلمان. بلا ما نتكلمو على دوامة الإنتقاء و الكونكور. 

زيادة لقطاعات الدولة لي تات خوصص أكثر فأكثر.

ما نساوش إتجاه القطاع العام لأنه يولي يخدم بالكونترا ديال 4 سنوات ...

واخا ... نتا ولا نتي باغين ديبلوم تي خدم فالدولة علاش ؟

إلا باش تنمي بلادك و تعطيها... برافو 

إلا باش تسلت و تقهوى و تحس بالإستقرار ... باز

راه حنا فوقت كلشي مزير و محتاج ... نهار الأول خدمتي و نتا عزري ... نهار غات زوج غات حتاج تطور ...

الخدمة فالبريفي تتعطي لأي واحد عندو ما يقول و راسو عامر.

صحيح كاين لي يقد يبدأ فالبريفي ب 1500 درهم و هو Bac+5 ولكن مور 5 سنوات عندو 30.000 درهم في الشهر. (هادا مثال شفتو بعيني).

واحد النهار هاد السيد يقد هو لي يولي مخدم الناس ...

الميساج ديالي ماشي بريفي أحسن ... ولكن الإنسان خاصو يدير وقفة ويشوف الأفكار لي عندو واش جديدة و واخدة بعين الإعتبار الواقع المغربي.